Utod ang kamot sang isa ka 59 anyos nga lalaki matapos ginlabo sa Purok Talutog, Barangay Dulao, Bago City, Negros Occidental kahapon alas-9:30 sang aga.
Ang biktima ang ginkilala nga si Winceslao Gonzales, 59 anyos, single samtang ang suspetsado naman ang ginkilala nga si Ronald Gemoto, 41 anyos, single kag ang duha ang lunsay residente sa nasambitan nga lugar kag parehas man nga mangunguma.
Sa interview sang Bombo Radyo Bacolod kay Police Master Sgt. Erwin Jamandre, investigator on case sang Bago City Police Station, ang biktima kag ang suspetsado ang may-ara na sang daan nga hiligut-anon kag isa na diri ang angot sa water irrigation system.
Samtang padulong sa talamnan sang humay ang biktima, hinali nalang ini nga ginbanggaan ni Gemoto bitbit ang espading.
Nagluntad ang komosyon sa tunga sang duha tubtob nga ginhanaan labo sang suspetsado si Gonzales apang nahimo pa sini nga makapalagyo.
Nahimo nga maabtan sang suspetsado ang biktima kag ini ang iya nga ginlabo-labo.
Suno kay Jamandre, agud indi maigo ang ulo, ginsagang sang biktima sang kamot ang espading gani nautod ang iya nawala nga kamot samtang nakaangkon naman sang pilas ang natuo sini nga kamot.
Ang biktima ang ginhingagaw naman dala sa Bago City Hospital kag ginsaylo sa Bacolod Queen of Mercy Hospital para sa dugang nga pagbulong.
Pahayag ni Jamandre nga masugilanon pa ang biktima, kag nahimo pa sini nga masaysay ang natabo samtang ang iya naman nga utod nga kamot ang ginturn-over sa iya mga himata.
Ang suspetsado ang gilayon naman nga nadakpan sang 2nd platoon sang 2nd Negros Occidental Police Mobile Force Company nga yara man ang detatchment sa nasambitan nga Barangay.
Sa karun si Gemoto ang yara na sa kustodiya sang Bago City Police Station kag natalana nga ipaidalum sa inquest proceedings subong nga adlaw sa kaso nga frustrated murder.
