Ginpahayag sang punong barangay sang Brgy. Taculing nga nagikan sa siyudad sang Bago ang baboy nga nagpositibo sa African Swine Fever sa ila nga barangay.
Sa interview sang Bombo Radyo kay Punong Barangay Lady Glez Gonzales-Pallen, nagkuha sang 10 ka baboy ang mga miyembro sang Sangguniang Kabataan sang ila barangay sa siyudad sang Bago nga ila proyekto agud nga sila may inugbayad sa ila nga tuition fee sa pag-eskwela.
Suno diri, sa napulo ka baboy may duha nga naglain ang pamatyag kag sang ini ang ginpatest, naggwa nga positibo ang mga ini sa ASF.
Ang isa ka baboy ang napatay sang kaagahon samtang ang isa naman ang buhi pa apang makaligad ang isa ka oras ini man napatay.
Nagdesisyon na lang gid ini nga idispose ang nabilin nga walo ka baboy.
Natsekyar naman ang area gikan sa lugar mismo nga ginbutangan sang mga baboy tubtob sa 500 meters nga kalayuon sa area, apang wala naman sang may nakita nga iban pa nga baboy.
Ila naman ginlubong ang mga baboy sa kapin 6 feet nga kadalumon.
Sa karun magapatawag ini sang meeting sa ila nga barangay agud mahatagan sang husto nga tikang ang problema sa ASF.
Gin-abisuhan man sini ang SK youth nga mangita na lang sang bag-o nga proyekto nga makuhaan sang ibayad sa ila nga tuition fee.
