670 ka pamilya kag 2,649 ka mga indibiwal sa banwa sang Hinobaan ang nag-evacuate kagab-i bilang preparasyon sa pagsulod ni Bagyo Betty.
Suno kay Social Welfare Development Officer 1 Guidralyn Lastrilla, 15 ka mga evacuation centers ang nagbukas sa pito ka mga barangay sa nasambit nga banwa.
Sa Barangay Sangke, may yara sang apat ka mga evacuation centers nga ginalakipan sang Barangay Hall, High School Sangke Annex, Arcadio L. Vergara kag Climente Lingamen Sr. Elementary School.
Sa Barangay Bulwangan, gintiniran man sang mga pumuluyo ang Barangay People’s Hall kag Bulwangan National High School.
May mga evacuees man sa Barangay Hall sang Barangay Asia; C.L. Hodges Elementary School, P6 Church kag Barangay Hall sa Barangay Alim; Manalimsim EC kag Barangay Hall sa Barangay Pook; PPAC sa Barangay 1; Bacuyangan Elementary School sa Barangay Bacuyangan; kag Day Care Center sa Barangay Talacagay.
Suno kay Lastrilla, ang ini nga data ang as of May 27, alas 6:00 sang aga.
Suno naman kay Local Disaster Risk Reduction and Management Assistant Edsel Ambagan, alas 7:00 kagab-i naghalin sa ila mga puluy-an ang mga pumuluyo sang Barangay Alim, Barangay Bulwangan kag Barangay 1 bangud nga nagapanaliti kag sila ang nagakahangawa nga ini ang magkusog pa.
Suno kay Ambagan, sa inisyal nga data, 57 ka pamalay kag 157 ka mga indibidwal ang nag-evacuate nagikan sa Barangay 1, nga isa sa mga flood prone area sa banwa.
Nagatinir ang mga ini sa People’s Activity Center kun sa diin may mga modular tent nga ginhatag ang LGU kag may mga foodpacks naman para sa ila.
Suno diri, nalakip ang isa ka senior citizen nga naka-wheel chair sa mga nagatinir sa karun sa evacuation centers.
Wala naman sang problema suno diri sa paghatag sang instructions sa mga pumuluyo bangud sila ang nagapamati kag wala na nagapasaway.
Suno sa LDRRM Assistant, kaina sang aga, tuman na kadamol ang ulan sa banwa apang wala naman sang power interruption.
