Magatambong sa isa ka international competition sa New York City ang Masskara Dancers sang Barangay Granada nga nagdaog sa Masskara Dance Festival 2022.
Mayo 29 magabyahe ang mga dancers padulong sa New York kaupod ang pila ka mga opisyales sang Bacolod City, ini ginalakipan nanday Mayor Alfredo Benitez, Punong Barangay Alfredo Talimodao Jr., City Tourism Officer Ma. Teresa Mananili, kag mga konsehal sang siyudad nga sanday Councilor Jason Villarosa, Celia Flor, Am Ang kag Simplicia Distrito.
Sa Hunyo 4, magaperform ang team sa Madison Square Garden sa New York.
Sa Hunyo 8 naman, magabyahe ang lima ka masskara dancers padulong sa Long Beach California nga sister city sang Bacolod.
Suno kay Bacolod City Mayor Alfredo Benitez, ang lakat sang team sa New York City ang para sa pagpasanyog sang turismo sa siyudad sang Bacolod.
Suno diri, indi lamang nila mapakita ang kultura sang siyudad apang ila man dala-dala ang future development sang Bacolod.
Samtang, suno naman kay Councilor Jason Villarosa, Chairperson sang Committee on Tourism indi lang popularidad sang Bacolod ang madala sa national apang ila man ini dal-on padulong sa international stage.
Suno diri, isa ini ka oportunidad para mapasundayag ang Masskara festival kag ang siyudad sang Bacolod.
