Magahatag ang local government sang San Enrique sang cash assistance sa mga hog raisers sa banwa nga napatyan sang baboy bangud sa hog cholera.
Suno kay Mayor Jilson Tubillara, P2 million ang pondo nga ginpain sang banwa agud nga ihatag sa mga napatyan sang baboy kag aprubado na ini sang Sangguniang Bayan bilang kabahin sang 2023 annual budget.
Antes makabaton sang cash assistance kag agud mangin patas sa tanan, ginaverify sa karon ang listahan sang mga apektado agud masiguro nga matuod nga ini ang napatyan sang baboy bangud sa hog cholera.
Ang listahanay sang mga apektado ang tubtub sa Mayo 31 kag ginalauman nga mapanagtag ang ayuda sa bulan sang Hunyo.
Target naman nga mahatagan sang ayuda ang 500 tubtub 600 hog raisers.
Bangud indi man tuman kadako ang budget sang banwa, ang hog raiser nga napatyan sang isa tubtub apat ka baboy ang mahatagan sang P3,000 samtang P5,000 naman ang ihatag sa napatyan sang lima pataas.
As of May 27, nagdangat na sa 2,143 ang nagkalamatay nga baboy sa banwa sang Enrique ukon katumbas sang masobra P24.7 million.
Bangud sini, ang San Enrique ang nagapanguna sa 14 ka mga banwa kag ciudad sa Negros Occidental sa may pinakamadamo nga apektado nga baboy.
