Nagpatigayon sang public hearing ang Bago City may kaangtanan sa kaso sang African Swine Fever matapos nagpagwa sang pahayag ang Barangay Taculing sa siyudad sang Bacolod nga ang mga baboy nga nagpositibo sa ASF ang nagikan sa ila nga siyudad.
Sa interview sang Bombo Radyo kay Ric Lauron, presidente sang Alliance of Hog Raisers Association of Negros Occidental, nagpadulong ini sa Bago City kaina sang aga bangud siya ang gin-imbitar sang Sangguniang Panlungsod para sa public hearing agud mahibaluan kun diin ang kinahanglan nga butangan sang pinakamataas nga pagbantay sa border control, kun sa Barangay Taculing ukon siyudad sang Bago.
Suno diri, dapat nga makuha ang impormasyon kun ang baboy bala ang gamay pa sang ginkuha ini sa Bago kag ginsagod sa Bacolod ukon dako na.
Ang public hearing ginconduct sang chairperson sang City Department of Agriculture kag gintambungan sang mga stockholders, mga hog raisers kag mga lideres sang mga local government units.
