Gin-athag ni Negros Occidental Governor Eugenio Jose ‘Bong’ Lacson nga magapabilin ini sa iya national party nga Nationalist People’s Coalition kag local political alliance nga Love Negros.
Madumduman nga sang nagligad nga semana, nagpatigayon na ang Commission on Elections sang hearing para sa accreditation sang Kilusan ng Nagkakaisang Pilipino kun sa diin isa sa mga key organizers amo si Bacolod City Mayor Alfredo Benitez nga isa man ka miyembro sang Love Negros sang nagaserbe pa ini bilang kongresista sa terser distrito.
Suno kay Lacson, wala pa nila naistoryahan ang angot sa KNP apang may kaugalingon naman nga national party ang mga miyembro sang Love Negros kag may yara man sila sang kahilwayan nga magsaylo ukon indi.
Suno sa gobernador, magapabilin siya nga miyembro sang NPC.
May yara naman sang local alliance sa Negros Occidental kag ginalauman naman ang alliances sa national level para sa incoming elections.
Wala naman nagapati si Lacson nga ang coalition diri sa probinsya ang maapektuhan sang nagakatabo sa national.
