Subong nga adlaw ginalauman nga magaabot ang official result sang confirmatory test kag endorsement nagikan sa Bureau of Animal Industry tuhoy sa duha ka mga baboy sa Barangay Singcang Airport, Bacolod City nga nagpositibo sa African Swine Fever.
Suno kay Engineer Albert Barrogo, director sang Department of Agriculture Region 6, ginalauman sini nga subong nga adlaw iya na mabaton ang official result sang confirmatory test sang duha ka mga baboy kag endorsement nagikan sa BAI.
Nagpadala naman ini sang sulat kay Bago City Mayor Nicholas Yulo kag subong nga adlaw man sini ginalauman nga makaangkon sang response tuhoy sa desisyon kun magahatag sang clearance ang ciudad agud makapatigayon sang surveillance sa ila area.
Suno diri, ang sulat ang iya man ginbase sa resulta sang imbestigasyon kun sa diin gin-identify sang owner sang baboy sa Taculing nga sa Bago City ini ginkuha.
Samtang, gin-athag man ni Barrogo nga kun red zone ang isa ka lugar, sarang ini nga makabaton sang baboy nagikan sa iban nga local government units apang indi ini makapagwa sang hogs.
Suno sa iya, ang pwede lang makabaton halin sa red zone area amu man ang mga banwa nga kaangay sini nga red zone.
Nagapangabay ini sa mga local government units nga iregulate ang mga manugbakal sang baboy bangud dako gid ang mabulig sang LGU tuhoy diri.
Iya ginapanginbulahan ang Provincial Government sang Negros Occidental sa ginahimo nga mga tikang batok sa ASF kag gina-engganyo ang mga LGU nga sila dapat ang forefront sa paghatag sang assistance sa mga hog raisers bangud limitado lamang ang budget sang ahensya.
