Tuman kabunok sang ulan sa syudad sang Bacolod kag pila ka bahin sang Negros Occidental humalin kahapon sang hapon tubtob subong nga kaagahon.
Bangod sa malain nga tiyempo, ang Bacolod kag pila ka mga banwa kag syudad sa Negros Occidental ang nag-extend sang suspension of classes, all levels, both public kag private schools, subong nga adlaw.
Samtang ang madamol nga pagbunok sang ulan nga may kaupod nga mga pagkilat ang nagresulta naman sa pila ka power interruptions.
Alas-2:00 kaina sang kaagahon, nagpagwa sang Heavy Rainfall Warning nga yellow warning level ang state weather bureau sa probinsya sang Negros Occidental.
Alas-5:00 kaina sang kagaahon, naghina na sa Severe Tropical Storm ang bagyo “BETTY” samtang yara sa kadagatan sang Batanes.
Alas-4:00 kaina sang kaagahon, ang mata sang bagyo ang ulihi nga nasiplatan sa 505 kilometers sa naaminhan-nasidlangan sang Itbayat, Batanes, ini ang may kabaskugon sang hangin nga nagadangat sa 110 km/h kag pagmadlos nga tubtob 135 km/h.
Ang bagyo ang nagahulag padulong sa North Northwestward nga dereksyon sa kadasigon nga 15 kilometros kada oras.
Samtang yara sa gihapon sa Tropical Cyclone Wind Signal No. 1 ang Batanes.
Ang bagyo ang ginalauman nga maggwa sa Philippine Area of Responsibility karun sa hapon ukon sa gab-i.
Subong nga Miyerkules, ang Southwest Monsoon ang maga-apekto sa Central kag Southern Luzon, Visayas, kag Mindanao.
Samtang ma-eksperyensyahan ang monsoon rains sa Occidental Mindoro, Antique kag northern Palawan kalakip na ang Cuyo, Calamian kag Kalayaan Islands tuga sang Southwest Monsoon.
Ang nabilin nga bahin sang Luzon, kalakip na ang Metro Manila kag ang Visayas ang makaeksperyensya sang magal-umon nga kalangitan nga may lapnagon nga pag-ulan kag pagpangilat tuga sang Southwest Monsoon kag Typhoon Betty.
Ang Mindanao ang maka-eksperyensya sang magulugal-umon tubtob sa magal-umon nga kalangitan nga may tumalagsahon nga tyansa sang pag-ulan kag pagpanaguob dala sang Southwest Monsoon.
Mabatyagan ang kasarangan tubtob sa mabaskog nga huyop sang hangin sa Northern Luzon padulong sa naaminhan-nakatungdan tubtob nabagatnan-nakatungdan, samtang ang nabilin nga bahin sang Luzon kag Visayas ang makabatyag sang kasarangan tubtob sa mabaskog nga huyop sang hangin padulong sa nabagatnan-nakatungdan.
Ang Mindanao ang makabatyag sang kasarangan tubtob sa mabaskog nga huyop sang hangin padulong sa nabagatnan tubtob nabagatnan-nakatungdan samtang ang baybayon sa bug-os nga pungsod ang may kasarangan tubtob sa mabaskog nga pagbalod.
Ginkumpirmar sang alkalde sang syudad sang Silay nga wala sang klase subong nga adlaw, June 1, sa tanan nga level, both public kag private nga mga eskwelahan sa nasambit nga ciudad.
Sa interview sang Bombo Radyo Bacolod kay Silay City Mayor Joedith Gallego, ginpalawig sini ang pagkanselar sang klase bangud luyag sini nga masiguro ang safety sang mga estudyante.
Suno diri, kun magpadulong ang mga estudyante sa eskwelahan kag mabasa sang ulan kag hilanaton mas dako ini nga problema sang mga ginikanan.
Nakaalerto naman ang Silay City Disaster Risk Reduction Management Office agud nga magbantay sang sitwasyon sa syudad bangud sa mabaskog nga pagbubo sang ulan.
Samtang nagpagwa man ang pila ka mga Local Government Units sang advisories nga wala sang klase bangud sa mabaskog nga pag-ulan nga ginalakipan sang syudad sang Kabankalan, Bago, kag Talisay, banwa sang Murcia, Isabela, EB Magalona, Cauayan samtang ang banwa sang Hinoba-an maga-desisyon kun iga-lift na ang class suspension subong pa nga aga.
Suno kay Mayor Daph Reliquias, hulaton pa nila ang rekomendasyon sang Hinoba-an Disaster Risk Reduction Management Office.
