Gin-athag sang presidente sang Metro Bacolod Lechonan Assiociation nga hilway sa African Swine Fever kag hog cholera ang baboy nga ila ginalechon.
Sa interview sang Bombo Radyo kay Bobby Badayos, sila ang nagakuha sang baboy sa banwa sang Isabela kag Moises Padilla, nga malayo sa mga hot spot areas nga may yara sang kaso sang ASF kag hog cholera.
Suno diri, antes nila ginabyahe ang mga baboy, ini ang gina-tsekyar sang Provincial Veterinary Office kag sa kada banwa kag siyudad nga ila maagyan may yara sang checkpoint sa mga baboy kun may yara bala sang nagapalangluya kag kun ano ang kondisyon sang mga ini.
Dugang pa niya, may yara ini sang permit gikan sa Provincial Veterinary Office gani wala sang dapat nga kahangaw-an ang mga konsumidor sa pagbakal.
Ginmanduan naman sini ang mga miyembro sang ila asosasyon nga indi magbakal sang mga baboy sa sulod sang Bacolod kag kun may magbakal man gid sa gwa sang siyudad mas maayo nga didto na gid lamang sa ila ginbaklan sa banwa sang Isabela kag Moises Padilla, ang mga banwa nga wala sang kaso sang ASF kag hog cholera.
Samtang sa karun, aminado si Badayos nga may yara sang pagnubo sa baklanay sang lechon matapos makumpirmar nga may yara sang kaso sang ASF sa Bacolod City.
Mensahe sini sa mga konsumidor nga maghalong sa pagbakal kag siguraduhon nga matinlo ang mga baboy.
