Kapin P340,000 nga balor sang suspected shabu ang nakumpiskar sa 19 anyos nga babayi kag 43 anyos nga lalaki sa drug buybust operation nga ginpatigayon sa Purok Mambuloc, Barangay 10, Bacolod City.
Ang mga suspetsado ang ginkilala nga sanday Leonora Suico, 19 anyos, residente sang Purok San Roque, Barangay Handumanan, Bacolod City nga ginakabig nga high value individual kag Anthony Eppie, 43 anyos, residente sang Purok Malipayon, Barangay 12, Bacolod City, nga ginakabig nga street level individual.
Sa interview sang Bombo Radyo kay Police Captain Paul Vincent Pendon, station commander sang Police Station 2, ang duha ka suspetsado ang magkasosyo sa illegal nga druga.
Nakuha sa paghinakop sang duha ang kapin 50 ka gramos sang illegal nga druga nga ginabanta nagabalor sang P340,000.
Padayon pa nga ginahibalo sang kapulisan kun may yara sang mga previous nga kaso ang duha kag kun sa diin ang source nga ila ginakuhaan sang druga.
Sa karun, yara na sa kustodiya sang Bacolod Citry Police Station 2 sanday Suico kag Eppie nga magapangatubang sa kaso nga pagbayolar sa RA 9165 ukon Comprehensive Dangerous Drugs Act of 2002.
