INDIA – May ginhatag nga bulig ang gobyerno sang India sa pamilya sang mga nagkalamatay sa pagbungguanay sang tatlo ka mga trains sa India sang Biyernes sang gab-i.
Indi magnubo sa 233 ang napatay kag 900 ang pilason matapos nagbungguanay ang duha ka passenger train kag isa ka train nga may unod nga mga goods sa ciudad sang Balasore sa Odisha state.
Suno sa disaster management agency, wala pa nahibaluan ang gintunaan sang aksidente apang gilayon nga nagpatigayon sang rescue efforts ang mga otoridad nga ginalakipan sang pagdeploy sang 115 ka mga ambulansya kag pila ka mga fire service units.
Suno kay Bombo International Correspondent Maritess Laxinto Kalyanakumar direkta sa India, madamo sang ospital sa Odisha state apang posible nga nagaginutok sa karun ang balaybululngan malapit sa lugar bangud sa kadamo sang biktima sa aksidente.
Suno sa iya, may ginhatag na nga bulig ang gobyerno sang India sa mga naaksidente kun sa diin ang pamilya sang napatay ang makabaton sang 10 lakhs ukon kapin P1 million.
Ginbuligan man sang gobyerno ang mga napilasan.
Nagpalab-ot naman sang pagpakig-unong si Indian Prime Minister Narendra Modi sa mga nalisdan kag ginpahayag nga nagapadayon pa ang rescue operations.
