Nagalaom ang convenor sang Power Watch-Negros nga iimplementar gilayon ang joint venture agreement sa tunga sang Central Negros Electric Cooperative, Inc. (CENECO) kag More Power.
Sa interview sang Bombo Radyo kay Wennie Sancho, satisfactory ang presentasyon sang More Power sang ila nga plano para sa JVA kun sa diin nasabat sini ang mga kwestyon sang mga nagapamatok.
Suno diri, dapat nga maimplementar sang gilayon ang JVA matapos sini makita ang trabaho sang More Power sa Iloilo kun sa diin dako ang kinalain sa tunga sini kag sang Ceneco sa pasilidad, rehabilitasyon kag mga equipment.
Nagapati man ini nga masarangan sang More Power nga islan ang mga daan na nga mga imprastraktura sang CENECO, gani suno kay Sancho, wala ini nakahibalo sang mga rason sang mga nagapamatok diri.
Dugang pa niya, may yara sang kapasidad pinansyal ang More Power nga mabuligan ang CENECO sa pagpasanyog sang operasyon sini.
Luyag lamang sini nga mahatag sa mga konsumidor ang maayo nga kalidad sang pagpangabuhi sa idalom sang CENECO.
Mensahe ni Sancho sa mga konsumidor nga mag-ugyon agud mapatigayon ang plebisito kun sa diin may kinamatarong sa pagboto ang mga member-consumers para sa pagbag-o.
Naghingyo man ini sang kooperasyon gikan sa mga konsumidor agud ma-implementar ang JVA para sa isa ka serbisyo nga nagakaangay gid bilang distribution utility sang kuryente.
