Gindimiss sang prosecutor ang kaso nga illegal gambling nga ginpasaka sang National Bureau of Investigation batok sa tatlo ka mga punong barangay sa ciudad sang Bacolod kag ciudad sang Kabankalan, Negros Occidental.
Ang mga punong barangay ang ginalakipan nanday Brgy. Tangub, Punong Barangay Noli Villarosa, Punong Barangay Joel Alibango sang Brgy. 5 kag Punong Barangay Franz Leonard Siguero sang Brgy. 6, Kabankalan City.
Madumduman nga ang tatlo ang ginpasakaan sang kaso nga illegal gambling santo sa reklamo sang Super Lucky Beagler Incorporated nga amo ang legal nga nagaoperate sang Small Town Lottery sa syudad sang Bacolod kag sa probinsya sang Negros Occidental.
Una man nga ginpahayag sang NBI nga si Villarosa ang ginatudlo financier sang STL samtang sanday PB Alibango Siguero ang nagpahanugot nga maka-operate ang illegal operation sang STL sa ila barangay sa Kabankalan City.
Suno kay NBI Special Investigator William De Arca Jr sang NBI Bacolod, sa resolution nga ginpagwa sang Prosecutor’s Office sang Kabankalan City, wala sang sufficient kag substantial evidence ukon probable cause nga nakita nga nangin ground sang dismissal sang kaso.
Suno kay De Arca, ila man sa karun iga-review ang ginpasaka nga kaso batok sa tatlo ka mga barangay officials kag kun ginalantaw man sang mga ini nga irefile ang kaso.
Liwat naman nga nagpanindugan ang punong barangay sang Barangay Tangub, ciudad sang Bacolod nga wala ini sang ikasarang nga mangin financier sang illegal nga pasugal ukon sa Small Town Lottery.
Suno kay Punong Barangay Noli Villarosa, wala siya naga-operate sang numbers game kag wala siya sang kapasidad para diri.
Suno kay Villarosa, ginaimbestigaran man siya kag ginabantayan man ang iya nga mga giho kag ang mga otoridad mismo ang nakahibalo nga wala sang kamatuoran ang akusasyon batok sa iya.
Gin-athag man sini nga wala siya nakapasa sang counter affidavit bangud nagpangayo sila sang iya abugado sang napulo ka adlaw nga extension sa deadline agud nga sila ang makapasa, apang wala pa man ini nakapasa, gindismiss na sang prosecutor ang kaso.
Ginalantaw man sini nga politically motivated ang pagdalahig sang iya ngalan kag pagpasaka sa iya sang kaso bangud sa illegal gambling.
