Duha ka mga balay ang totally burned kag duha ang partially burned lakip na ang isa ka sari-sari store sa sunog nga nagluntad sa Purok Rosal, Barangay Zone 7, Talisay City kaina sang aga.
Sa interview sang Bombo Radyo kay Kagawad Lalaine Baradas, nagsugod ang kalayo sa puluy-an ni Priscilla Emnase, isa ka senior citizen kaupod ang iya duha ka mga apo nga lunsay mga menor-de-edad.
Suno kay Baradas, kaupod ni Emnase nga nagaistar sa balay ang iya mga kabataan, mga pakaisa kag hinablos apang nagbakasyon ang mga ini sa Singapore kag sila na lamang tatlo ang nabilin.
Suno diri, nagbrown-out sa puluy-an sanday Emnase kag gintawag ini sang iya apo nga may yara sang aso.
Pag-abre sini sa isa ka kwarto, iya nakit-an nga nagaibwal na ang kalayo gani sila ang nagwa sa balay.
Nasunog man ang Mitsubishi Adventure nga maroon sang pamilya.
Magluwas diri, suno sa kagawad, gintupok man sang kalayo ang balay ni Bebing Elisan samtang partially damaged ang grocery store ni Van Galaga.
Nakaangkon man sang gamay nga halit ang balay ni Rose Elisan bangud sa sunog.
Wala naman sang may napilasan ukon nasamaran sa insidente.
Nagpatigayon sang meeting ang mga opisyales sang barangay tuhoy sa assistance nga ila igahatag sa mga nasunugan kag sarang man ang mga ini nga temporaryo nga makatinir sa barangay hall.
