Nagapanindugan ang acting General Manager sang Central Negros Electric Cooperative nga may yara sang blessing kag giya nagikan sa National Electrification Administration ang ila pagperma sang Joint Venture Agreement sa tunga sang CENECO kag More Power.
Sa interview sang Bombo Radyo kay Atty. Arnel Lapore, nag-agi sa insakto nga proseso ang ila pagperma sang JVA kag may blessing ini nagikan sa NEA, nga amu ang boss sang CENECO paagi sa administrative kag legalities.
Ini ang sabat ni Lapore sa pahayag ni Atty. Luke Espirito nga null kag void ang JVA bangud wala otoridad si Ceneco Board of Director President Jojit Yap kag Lapore sa pagperma sini.
Suno kay Espirito, illegal kag mapaanggid sang criminal act ang pagperma sang nasambit nga agreement nga wala sang nagakaigo nga otoridad.
Suno sa acting General Manager, ang korte amu ang magadeterminar kun legal ukon illegal ang ila proseso sa pagperma sang joint venture agreement.
Suno diri, ang tagsa ka mga member-consumer ang may yara sang kinamatarong nga makigbahin sa plebisito kag indi lamang ang mga nagasinggitan kag nagaprotesta batok diri.
Suno sa iya, kun magboto sang NO ang mga konsumedor kag ireject ang JVA sa plebisito, ila ini respetuhon apang kun madamo ang maga-YES, dapat respetuhon man ini.
Dugang pa ni Lapore nga tuman ka complex ang serbisyo sa distribution utility gani mensahe sini sa mga nagareklamo nga kuntani tamdon nila kun may yara sang iban nga solusyon sa pagbayad sang utang sang CENECO kag pagpakay-o sang mga daan kag dilapidated equipments sang electric cooperative.
Samtang, ginpahayag sang acting General Manager sang Central Negros Electric Cooperative nga ginatun-an pa kun ano nga pwede mahimo para sa mga empleyado kag nagpanindugan nga wala ini nag-abandonar sa ila kag padayon nga naga-upod sa interest sang mga empleyado.
Kahapon, ginpabutyag ni Leonard Guilaran, Presidente sang Responsible Supervisory and Confidential Union of Employees sang CENECO ang ila pagpamatok sa joint venture agreement kag nagpanawagan sang resignation ni Lapore.
Suno sa acting General Manager, wala ini sang may nakit-an nga resolusyon nagikan sa union nga nagapanawagan sang iya resignation gani iya ginakabig nga personal nga pahayag lamang ang statement ni Guilaran.
Suno kay Lapore, wala ini nagapati nga ini man ang sentimento sang kadam-an sang mga empleyado nga luyag magtrabaho para sa ikaayo sang mga member consumers.
Nagapati ini nga madamo sa gihapon nga mga empleyado ang nagapati sa ila abilidad nga mangin mapuslanon sa pagpadayon sang serbisyo pata sa kooperatibakag nagalantaw nga secured ang putoro sang ila pamilya sa mga board of directors.
Suno sa iya, sa Joint Venture Agreement, ang interest sang mga konsumedor ang ginalantaw bangud tinutuyo sini nga sila ang mahatagan sang maayo kag nagakaigo nga serbisyo bilang highly organized city.
Kun ano man ang personal nga panindugan ni Guilaran, suno diri, iya ini ginarespeto apang ila pagahatagan sang importansya ang kapin 207,000 member-consumers nga amu ang dapat serbisyuhan sang CENECO.
Dugang pa sini nga kinamatarong sang mga nagapamatok ang pagpalayag sang ila mga paino-ino apang dapat nga tamdon ang numero sang mga konsumedor nga luyag magpadangat sang ila mga opinyon paagi sa plebisito nga patigayunon sa Hunyo 24 kag 25 kag Hulyo 1 kag Hulyo 2.
