Igademolish na sang Bacolod City Legal Office ang mga balay sa Mambuloc Creek sa masunod nga semana matapos nag-expire subong nga adlaw, Hunyo 10 ang notice to vacate nga ginpapanaog sa mga residente.
Sang Mayo 10, nagpadala sang notice ang City Legal Office para sa demolition kag gingaan ang mga ini sang 30 ka adlaw agud maghalin sa Mambuloc Creek kag magsaylo sa relocation site sang ciudad.
Suno kay Ting, dapat nahimos na sang mga residente ang mga ila balay subong nga adlaw bangud pagkasunod nga semana, wala sang choice ang City Legal Office kun magpatuman sang demolition.
Suno diri, indi na sila maghatag sang isa pa gid ka notice to vacate bangud magaset nanaman sang bag-o nga date.
Suno sa iya, santo sa local government code, kun magpahalin sang mga pumuluyo, dapat may yara sila sang sayluhan nga relocation site ukon makabaton sang financial assistance depende sa alkalde.
Sang damlag lang, nagpanawagan man ang ciudad nag magpadulong ang mga ini sa Bacolod Housing Authority agud sila ang maka-apply.
Suno kay Ting, bangud sa mga informal settlers, nagakadelay ang mga proyekto sang Department of Public Works and Highways kag kun hulaton sila nga maghalin, magaulan nanaman kag magabaha.
Dugang pa sini nga mismo ang BHA na ang nagpadulong sa Mambuloc Creek agud makaproseso ang mga informal settlers apang wala na may mahimo ang ciudad kun wala gana mag-apply ang mga ini.
