Nagapanawagan ang hepe sang Bago City Police Station sa mga may namissing nga himata nga makig-angot sa ila estasyon agud ma-identify ang bangkay.
Sa interview sang Bombo Radyo kay Police Lt. Col. Joem Malong, hepe sang Bago City Police Station, wala sa gihapon sang identity ang lalaki nga nasapwan nga wala na sang kabuhi sa katubuhan sa Purok Maasin, Barangay Dulao, Bago City, kahapon sang aga.
Suno kay Malong, wala pa sa karun sang pamilya nga nag-inquire tuhoy diri.
Madumduman nga ini ang nasapwan nga nagahapa, wala sang pang-ibabaw nga bayo, nakamaong nga itom kag wala sang tsinelas.
Ginabanta nagaedad ang biktima sang masobra 30 tubtob 35 anyos kag 5’4 ang kataason.
Suno kay Ogares, nagapanglakaton sa dalan si Roselyn sang nakapanimaho ini sang indi manami nga baho kag sang ila ginpalapitan ang hilamunan, didto nasapwan ang bangkay.
Sa ila pagpangusisa sa mga residente, sila ang may nabatian nga isa ka lupok sang Domingo, apang indi pa makumpirmar kun lupok sang armas.
Indi man makumpirmar kun may yara sang buho ang lawas sang biktima kag kun ang iya mga pilas ang tuga sang luthang, buno ukon labo.
Suno sa iya, may tattoo ini sa nawala nga abaga nga daw kaangay nga tribal ang design apang indi maayo makit-an bangud naga-itom na.
Nagapanawagan ini sa may mga himata nga namissing nga makig-angot lamang sa Bago City Police Station agud ini ang ma-identify.
