Dead on arrival sa ospital ang isa ka tricycle driver matapos nga masagaigaran sang isa ka pa ka tricycle sa national highway sa Barangay Bagonawa, banwa sang San Enrique, Negros Occidental sang Hunyo 11.
Ginkilala ang napatay kay Ernesto Espinosa, 57-anyos, kasado kag pumuluyo sang Barangay Baliwagan sang amo nga banwa.
Sa interview sang Bombo Radyo Bacolod kay Police Major Bonifacio Aral, Chief of Police sang San Enrique Municipal Police Station, nag-overtake ang tricycle nga ginamaneho ni Archie Guanzon sa tricycle nga ginamaneho ni Espinosa , kag nadulaan sang control kag nagbalang-balang ang tricycle.
Bangud sini, naigo sa ulo si Espinosa sang kahoy nga karga sa tricycle ni Guanzon nga gintunaan sang ila nga pagkatumba.
Suno kay Aral, si Guanzon ang nakaagom man sang gasgas apang gilayon nga nakatindog kag nagpalagyo samtang ang biktima ang gilayon nga gindala sa Don Salvador Benedicto Hospital sa syudad sang La Carlota apang gindeklarar nga dead on arrival.
Ginpahayag man ni Aral nga ang suspek ang boluntaryo man nga nagsungka sa San Enrique Municipal Police Station.
Suno sa hepe nakadepende man sa duha ka bahin kun ano ang settlement kag kun may magpasaka sang kaso ila man nga I-assists.
