Nagahingyo ang Punong Barangay sang Barangay 2, syudad sang Bacolod nga palawigon ang deadline sang pagpahalin sa mga illegal settlers sa Purok Lampirong, Barangay 2.
Nahibaluan nga may yara sang 32 ka mga pamilya ang ginpapanaugan sang city government sang Notice to Vacate bangud ang mga balay sang mga ini ang yara na sa Mambuloc Creek.
Ginapahalin ang mga ini agud nga matigayon na ang proyekto sang Department of Public Works and Highways ( DPWH).
Sa 32 ka mga ginpanaugan sang Notice to Vacate, 14 pa lang diri ang nakaproseso sang dokyumento sa Bacolod Housing Authority agud nga makakuha sang relocation site sa Barangay Vista Alegre, syudad sang Bacolod.
Sa interview sang Bombo Radyo Bacolod kay Punong Barangay Emelda Banguanga sang Barangay 2, nagaapelar ini sa syudad sang Bacolod sang extension sa pagproseso para sa relocation sang mga ginpanaugan sang notice to vacate sa ila nga Barangay agud nga makompleto sang mga ini ang ila nga papeles nga ginarequire sang BHA para sa relocation site.
Suno diri, 14 pa lang sa 32 nga nagapanaugan sang Notice to Vacate ang nakakumpleto sang requirements kag naqualify nga ma-awardan sang relocation site.
Suno pa sa Punong Barangay, ginahulat pa man sang mga ini ang financial assistance nga ihatag sa 32 ka pamilya nga ginapahalin sa bahin sang Mambuloc Creek agud nga mapadayon na ang proyekto sang DPWH sa nasambit nga lugar.
Suno kay Banguanga, wala man sang mahimo ang Barangay sa pagparelocate sang mga residente bangud gobyerno na ang nagmando sini para sa development sang syudad.
