Ginkumpirmar sang commander sang 62nd Infantry Battalion sang Philippine Army nga duha ka katapo sang New Peoples Army ang napatay sa ginlunsyar nga combat operation sa Barangay Macagahay, Moises Padilla kasunod sang nabaton nga report sa presensya sang armado nga grupo.
Sa interview sang Bombo Radyo Bacolod kay Lt. Col. William Pesase, may yara sang informant nga nagpahibalo sa katapo sang 62IB nga may yara sang presensya sang armado nga grupo sa nasambit nga lugar.
Gilayon man nga nagpatigayon sang combat operation ang tropa sang gobyerno kun sa diin naengkwentro sang mga ini ang nabilin nga miyembro Central Negros 1, nagdugay sa 20 minutos ang una nga enkwentro sa anum ka katapo sang nasambit grupo sa Sitio Agogolo, Brgy Macagahay, Moises Padilla.
Liwat nga nagluntad ang pagbayluhanay sang lupok nga nagdugay sang 15 minutos sang nakaengkwentro naman sang mga ini ang isa pa ka platoon sang 62IB sa Sitio Mantauyan, Brgy Macagahay Moises Padilla matapos nga maglikaw ang nasambit nga grupo sang rebelde sa nagabantay nga tropa sang 62IB,kag nagpalagyo sa naaminhan nga direksyon.
Wala sang casualty sa bahin sang gobyerno apang duha ang reported sa bahin sang NPA.
Narekober sa encounter site ang isa ka M16 Rifle bearing SN RP082622, isa ka 12-Gauge shotgun, isa ka .38 Revolver, apat ka short magazine nga gin-assemble para sa M16, duha ka (2) rounds sang serviceable ammunition para sa Shotgun, anum ka rounds sang serviceable ammunition para sa .38 Revolver, 79 rounds sang 5.56mm ball para sa M16, isa ka Rifle Grenade, duha ka bandoliers, isa ka binoculars, duha ka backpacks, duha ka sling bag kag isa ka (1) power bank.
Kabug-usan nga 32 ka pamilya ang nagevacuate kag nasecure na sa t Sitio Mantauyan, Brgy Macagahay Evacuation Center.
Ang mga nag-evacuate ang nahatagan na sang foodpacks sang Moises Padilla Task Force-ELCAC paagi sa Municipal Social Welfare and Development Office (MSWDO) sang banwa.
Liwat naman nga nagapanawagan ang 62nd Infantry Battalion sa mga napilasan kag nagpalagyo nga mga rebelde nga magsungka na.
Ang pwersa sang gobyerno ang nagahatag sang mga ini sang kahigayunan nga magbalik sa sabak sang gobyerno bangud ang tropa sang gobyerno ang indi mag-untat sa paglagas sa ila agud nga masiguro kag mapabilin ang kalinong kag mapadayon ang development sa Central Negros.
Samtang 175 ka mga indibidwal ang yara sa karun sa evacuation center sa Barangay Macagahay, Moises Padilla matapos ang nagluntad nga engkwentro sa tunga sang New People’s Army kag 62nd Infantry Battalion sang Philippine Army.
Suno kay Local Disaster Risk Reduction and Management Office Head Reynald Horegue, as of 5:00 pm kahapon, 175 ka mga indibidwal kag 47 ka pamilya nagikan sa tatlo ka mga sitio ang nag-evacuate bangud sa engkwentro.
May yara man sang iban pa nga evacuees nagikan sa iban nga sitio apang wala pa sila sang rekord tuhoy diri.
