Mangapangatubang sang kaso nga adultery ang asawa sang pulis kag ginaalegar kerido sini matapos madakpan sa entrapment operation sang Bacolod Police Station 8 sa isa ka apartment sa Barangay Singcang Airport.
Suno kay Police Captain Melvin Mercado, officer-in-charge sang Bacolod Police Station 8, kagab-i, nagpadulong sa ila estasyon ang isa ka police corporal nga nagatrabaho sa idalum sang Negros Occidental Police Provincial Office (NOCPPO) matapos niya ginsundan ang iya asawa nga isa ka broker dealer kag sang nakit-an niya ini nga nagsulod sa apartment sa Barangay Singcang Airport.
Suno diri, madugay na ini nga may panagupnop nga may kerido ang iya asawa.
Suno kay Mercado, ila ini ginpatigayunan sang entrapment operation kag didto nadakpan ang duha.
Suno sa iya, 2009 pa naga-upod ang mag-asawa apang may mga konflikto na sa ila relasyon kag naga-upod na lamang bangud sa ila duha ka mga kabataan.
Desidido naman ang pulis nga magpasaka sang kaso batok sa duha, nga sa karun yara sa kustodiya sang Bacolod Police Station 8.
