Napapanaog ang bangkay sang duha ka gina-alegar nga miyembro sang New Poeples Army nga napatay sa ginlunsyar nga combat operation sa Barangay Macagahay, Moises Padilla kahapon.
Sa interview sang Bombo Radyo Bacolod kay Brigadier General Orlando Edralin, commander sang 303rd Infantry Brigade sang Philippine Army, narecover na nila ang duha ka bangkay kag ginsakay nila ini sa aircraft paagi sa assistance sang Philippine Airforce kasubong man sang team sang Scene of the Crime Operation (SOCO) kag Municipal Disaster Risk sang Moises Padillasang bangud sa tuman ka layo nga lugar.
Suno kay Edralin, ginaproseso na sa karun ang bangkay sang duha ka rebelde nga napatay.
Suno sa 303rd Infantry Brigade Commander, ang mga naengkwentro sang 62nd Infantry Brigade ang mga nabilin nga miyembro ukon remnants sang Central Negros 1.
Madumduman nga sa ginpatigayon nga combat operation sang tropa sang gobyerno ila naengkwentro ang nabilin nga miyembro sang Central Negros 1, nagdugay sa 20 minutos ang una nga enkwentro sa anum ka katapo sang nasambit nga grupo sa Sitio Agogolo, Brgy Macagahay, Moises Padilla.
Wala sang casualty sa bahin sang gobyerno apang duha ang reported sa bahin sang NPA.
Samtang, nakapauli naman sa tagsa ka mga panimalay ang mga evacuees sa Sitio Mantauyan, Brgy Macagahay Evacuation Center kahapon, matapos gindeklarar nga safe na ang area.
Nagapanawagan ang pamunuan sang 303rd Infantry Brigade sa mga nabilin pa nga miyembro sang NPA nga magsungka na kag magbalik sa sabak sang gobyerno.
Kasubong man, nagpanawagan man ini sa pamilya sang mga napatay nga rebelde nga makig-angot man sa ila agud mahatagan sang nagakaigo nga paglubong ang mga ini kag mahatagan man sila sang bulig.
Magapangayo man ini sang bulig sa mga nauna na nga mga rebelde nga nagsungka agud matumod ang mga napatay.
