Ginkumpirmar sang school principal sang Mariano G. Medalla Integrated School sa Barangay Pahanocoy syudad sang Bacolod nga ang estudyante nga gin-upod ni Vice President Sara Duterte sa biyahe sini sa Brunei Darussalam kag Singapore ang nagikan sa nasambit nga eskwelahan.
Suno kay Herminio Remada Jr., ang 14 anyos nga bata ang nakita lamang sang bise presidente sang nagbisita ini sa MG Medalla Integrated School matapos nga nagsabat sa pamangkot angot sa teenage pregnancy.
Suno kay Remada, bangud nanamian ang bise presidente sang sabat sang bata sa pamangkot sini, ginkuha niya ang ngalan kag contact number sang bata bangud may plano ini nga dal-on ang bata sa official visit sini sa duha ka pungsod.
Suno sa school principal, maayo ang performance sang bata kag maayo ini magplastar sang iya ideas sa pagsabat sang mga pamangkot kun sa diin nakuha sini ang atensyon sang bise presidente.
Kaupod sang bata nga gin-imbitar sang bise presidente ang iloy sini kag allexpense paid man sang Office of the Vice President.
Suno kay Remada, ginhatagan ang mag-iloy sang imbitasyon kag ginschedule sa Department of Foreign Affairs agud nga maproseso ang mga papeles para sa ila nga paglakat kaupod ang bise presidente.
Una na nga nagsulat sa DFA ang bise presidente nga iaccommodate ang mag-iloy agud nga magproseso sang papeles para sa ila nga paglakat.
Ginkalipay man sang school principal nga estudyante sang mga ini ang kabahin sang delegasyon ni Vice President Sara Duterte para iya nga official visit kag pagtuman sang iya katungdanan bilang presidente sang Southeast Asian Ministers of Education Organization (SEAMEO).
