Pila pa lang ka tuig nga nagaistar sa Sitio Kangkiling, Brgy. Buenavista, Himamaylan City, Negros Occidental ang Pamilya Fausto nga ginmassacre kagab-i.
Sa interview sang Bombo Radyo kay Punong Barangay Harry Higgins sang Barangay Buevanista, tumandok sang Basay, Negros Oriental sanday Rolly kag Imelda Fausto kag sang tinalikdan nga tinuig lang nagsaylo sa Sitio Kangkiling.
Bangud sini, indi pa sila kilala gid sang mga pumuluyo sa lugar kag wala man ini ideya kun ano ang background sang Pamilya Fausto.
Suno kay Higgins, wala ini sang ideya kun ano ang motibo sa pagmassacre sa pamilya.
Aminado naman si Higgins nga red zone ang ila barangay bangud may presensya diri sang mga miyembro sang New People’s Army.
Nabatian man nila ang linupok kagab-i.
Suno kay Barangay Kagawad Arlene Entirro, nakarecord sa ila barangay nga ginsuspetsuhan sadto ang pamilya Fausto nga nagasuporta sa mga miyembro sang New People’s Army.
Suno diri, nagreport sa barangay ang pamilya nga ginlibutan sila sang mga miyembro sang Philippine Army apang madugay na ini natabo kag mahimo nga nag-lie low na ang mga ini.
Nagsaylo man ang pamilya sang ila kamalig gani sa karon, unknown pa gid para sa mga barangay officials kun sin-o ang mga suspetsado.
