Nagdangat na sa 14 ang mga benepisyaryo sang Enhanced Comprehensive Local Integration Program (E-CLIP) sang gobyerno sa Negros Occidental.
Ang mga benepisyaryo ang ginalakipan sang mga anay mga rebelde nga nagsungka kag nagbalik na sa sabak sang gobyerno.
Sa interview sang Bombo Radyo Bacolod kay Brigadier General Orlando Edralin, commander sang 303rd Infantry Brigade sang Philippine Army, ginapakita sa karun sang gobyerno kun paano nila buligan ang mga nagsungka nga mga mga rebelde agud nga liwat nga makapangabuhi sang normal kaupod ang ila nga mga pamilya.
Suno kay Edralin ang mga beneficiaries sang nasambit nga programa ang ginpaidalom man sa proper profiling agud nga mahatag gid sa mga ini ang nagakaigo kag nagakadapat nga bulig.
Suno sa 303rd Infantry Brigade commander, ang mga beneficiaries ang nakabaton sang immediate assistance gikan sa gobyerno nga nagabalor sang P10,000; livelihood assistance P15,000 kag nagapanawagan man ini sa iban nga ahensiya sang gobyerno nga makahatag sang mga trainings kag kun ano pa ang mahimo nga mabulig sa mga surrenderees agud liwat nga makapangabuhi.
