Nagapadayon pa ang hot pursuit operation sang 62nd Infantry Battalion sang Philippine Army sa mga katapo sang New People’s Army nga ila naka-engkwentro sa Sitio Lower Macagahay, Brgy. Macagahay, Moises Padilla alas 11:15 kagab-i.
Suno kay Lt. Col. William Pesase, commander sang 62nd IB, naka-engkwentro sang tropa ang apat ka mga rebelde samtang nagapatigayon sang Company Operations sa nasambit nga lugar.
Ini ang nagdugay sang lima ka minutos.
Sa karun wala pa nadeterminar kun may casualties sa mga NPA samtang wala naman sang may nasamaran sa tropa sang gobyerno.
Ginkumpirmar man sini nga may isa ka rebelde nga nadakpan sa engkwentro kagab-i kag sa karun yara sa kustodiya sang mga otoridad.
Samtang, naclaim na kahapon ang bangkay sang duha ka mga NPA nga napatay sa engkwentro batok sa mga militar sa Sitio Agogolo, Barangay Macagahay sang Hunyo 13.
Suno kay Pesase, ginkilala ang mga ini kanday Benjie Ebarle alyas “Omar” kag Rowino Anobong alyas “Wen” lunsay mga miyembro sang Central Negros 1 kag mga residente man sang nasambit nga barangay.
Suno diri, mga regular nga miyembro lamang ini bangud ang leader nila ang isa sa mga nakapalagyo.
