Ginkumpirmar sang alkalde sang Himamaylan City nga may yara na sila sang lead kun sin-o ang mga suspetsado nga nagmassacre sa Pamilya Fausto sa Sitio Kangkiling, Brgy. Buenavista sang Miyerkules sang gab-i kun sa diin high-powered firearms ang gingamit.
Sa interview sang Bombo Radyo kay Himamaylan City Mayor Rogelio Raymond Tongson, nagahingyo ini sa Philippine National Police nga iresolbar ang natabo nga insidente sa mas madali nga tinion.
Suno diri, suportado sang siyudad ang nabilin nga pamilya sa pagpalubong sa ila nga himata kag indi sini pagtalikdan ang pamilya tubtob nga maggwa ang kamatuoran.
Dugang pa sini, madugay naman ang pagtinir sang pamilya sa Barangay Buenavista nga nagikan sa Negros Oriental apang ang isa ka bata ang nakapamana sang taga-Himamaylan gani sila ang nagsaylo sang puluy-an.
Suno kay Tongson, may yara na sang lead ang mga imbestigador apang indi sini luyag nga pangunahan ang imbestigasyon gani mas maayo nga hulaton kag respetuhon ang trabaho sang mga otoridad.
Gin-athag man sini nga indi lang ini local issue kun tulokon apang ini ginakabig nga national issue may kaangtanan sa peace and order.
Gani, padayon sa gihapon ang mga aktibidades, proyekto kag programa sa siyudad, kag suno kay Tongson may yara sang dako nga pagbag-o sa ciudad humalin sa pagpungko sini bilang alkalde gani wala sang kamatuoran ang ginahambal nga may isyu ang ciudad sang Himamaylan.
Mensahe sini sa pumuluyo sang ciudad nga wala sila sang dapat nga kahangaw-an bangod nga gintutokan sa karun nga maresolba ang natabo nga pagmassacre kag magpadayon sa pagsalig sa pwersa sang gobyerno kag ciudad bangod ini gamay lamang nga pagtilaw.
