Magapatigayon man sang kaugalingon nga imbestigasyon ang Commission on Human Rights sa Negros Occidental sa natabo nga pagmassacre sa Pamilya Fausto sa Sitio Kangkiling, Brgy. Buenavista, Himamaylan City.
Sa interview sang Bombo Radyo kay Commission on Human Rights dirertor Vincent Parra, sila ang maga-conduct sang kaugalingon nga imbestigasyon sa nagluntad nga massacre sa Himamaylan City.
Suno diri, nakig-angot sila sa Philippine National Police angot sa imbestigasyon kag nag-request sang dokumento sa mga updates.
Pahayag ni Parra nga may yara sang gina-alegar nga napatay ang pamilya bangod sa nagluntad nga engkwentro apang may yara man sang ginaalegar nga sila ang ginpatay sang New People’s Army.
Aminado man ini nga blangko sa gihapon ang mga otoridad kun ano ang motibo sa pagpatay dugang pa nga wala sang may naka-witness sa natabo.
Sa karun ila pa ginahulat ang development sa imbestigasyon apang ila man ginaplano nga padulungan ang nakaluwas nga bata nga babayi agud ila maistorya.
Si Emily Fausto Germino ang nagapuyo man sa Barangay Buenavista, ciudad sang Himamaylan apang may kaugalingon na ini nga pamilya gani wala ini nagapuyo sa isa ka balay kaupod ang iloy, amay kag iya mga utod.
