Naghalin sa ila mga puluy-an ang mga kaingod sang Pamilya Fausto kag nagsaylo sa ila mga himata sa bangud sa kulba kag trauma nga gintuga sang massacre nga nagluntad sa Sitio Kangkiling, Brgy. Buenavista sang Miyerkules sang gab-i.
Suno kay Punong Barangay Harry Higgins, daw indi gid mabaton sang mga kaingod sang Pamilya Fausto ang natabo sa ila kag nagakahangaw man sang ila nga kaluwasan gani nagbiya ini sa ila mga puluy-an.
Suno kay Higgins, ang duta nga ginatanuman ni Rolly sang mais ang ginapanag-iyahan sang isa sa iya mga kaingod nga naluoy sa iya gani ginapahanugutan ini nga magtanom didto.
Antes ang makasilidhi nga insidente, nakaupdanay pa si Rolly kag ang iya kaingod bangud nagatalauma man ini sang mais.
Samtang, sa lain naman nga sitio nagapuyo ang subang nga bata sanday Rolly kag Imelda kaupod ang iya bana kag mga kabataan.
Suno sa punong barangay, igakumpirmar pa sini kun bwas gid man ang lubong sang Pamilya Fausto, nga nahaya sa karun sa funeral homes Barangay Aguisan, Himamaylan City.
Suno kay Higgins, ang Barangay Buenavista ang pinakalapad nga barangay sa Negros Occidental nga ginabug-usan sang 70 ka purok.
Nagapanawagan naman ini sa mga pumuluyo nga magbuligay lamang kag magpangamuyo.
