Nagakampanya ang anay Presidente sang Central Negros Electric Cooperative pabor sa Joint Venture Agremeent sa tunga sang CENECO kag MORE Power agud makapadayon ang franchise sang electric cooperative.
Suno kay Roy Cordova, 50 ka tuig ang franchise kag corporate life sang CENECO kun sa diin gin-grant ang provisional franchise sang 1975 kag ginhatagan sang permanent franchise sang 1980.
Suno sa iya, bangud sa sitwasyon sang electric cooperative sa karun, indi sigurado kun makarenew ini sang franchise.
Magluwas diri, madamo sang may plano mga mag-apply sang bag-o nga franchise sa coverage area sang CENECO.
Ini ang rason kun ngaa nagakampanya ini pabor sa JVA agud indi madula ang pagserbi sang electric cooperative sa coverage area kag mapadayon ang existence sini sa masunod nga 50 ka tuig.
Suno kay Cordova, ang pinakaimportante nga tinutuyo sang JVA magluwas sa pagpatahom sang serbisyo para sa mga konsumedor amu ang pagkuha sang bag-o nga franchise nga indi maagum sang CENECO kun wala ang joint venture agreement.
Nagpanugyan man ini sa mga empleyado nga bisitahon ang non-economic provision sang Constitution and By-Laws sang CENECO agud madula ang kahangawa sang mga ini nga sila ang mawad-an sang trabaho.
