Ginkumprimar sang hepe sang Bacolod Police Station 9 nga nadulaan gid sang kabuhi ang biktima sa shooting incident nga nagluntad sa Purok Ilaya, Barangay Cabug, Bacolod City, kahapon.
Ginkilala ang biktima kay Joerie Delacruz, yara sa legal nga edad, wala sang permanente nga trabaho kag residente sang nasambit nga lugar.
Sa interview sang Bombo Radyo Bacolod kay Police Captain Michael Tuburan, gintinguhaan pa nga gin-revive ang biktima kag tughungan sang dugo apang bangud sa pilas sa ulo kag lawas wala na matigayon.
Madumduman nga una na nga gin pahayag sang commander sang police station 9 nga, nagatambay sa likod sang ila balay ang biktima kag may yara sang isa ka lalaki nga nagapangita kay Delacruz.
Nabatian na lamang ang duha ka lupok kag nakait-an si Delacruz nga nagahamyangon na.
Sa karun ila ginalantaw nga anggulo may kaangtanan sa trabaho ukon sa personal nga pagpangabuhi.
Samtang suno naman kay alyas Dodong nga kaupod sang biktima sang natabo ang insidente, nakamask, may kalo, naka dilargo kag stripe nga jacket ang lalaki nga nagtiro kay Dela cruz.
Nakita sini nga nalagyo ang suspek matapos sini gintiro ang biktima.// Gilayon nga gindala ang biktima sa ospital agud mahatagan sang nagaka-igo nga pagbulong.
