Kadungan sang selebrasyon sang 85th Charter Day sang Bacolod City kahapon, ginhatagan man ni Bacolod City Mayor Alfredo “Albee” Benitez sang pagkilala si Julius Caesar Benedicto Esmeralda kag ini ang ginhatagan sang labing una nga “I’ll Be the Change Award”.
Ini ang ginhatag kadungan sa “Ang Banwahanon Award” event nga ginpatigayon sa L’Fisher Hotel.
Ang “I’ll Be the Change Award”, ang pagkilala nga ginahatag sa indibidwal nga nakahimo sang dako nga impact sa syudad pinaagi sa ila nga mga buhat tuga sang kabuot, wala pagtahaw nga commitment kag indi mabaslan nga pagserbisyo.
Ang indibidwal ang makabig driving force sa likod sang positibo nga transformatuon sa komunidad.
Si Esmeralda ang gindayaw matapos nga ginasaway sini ang nakit-an nga persona nga may dala sang ginkawat nga manhole cover.
Suno diri, nakita niya mismo nga ginahakwat sang mga suspetsado ang manhole cover kag siya ang nakahibalo nga ini ang indi husto tubtob nga sila ang makadangat sa atubang nga gate sang Sugar Regulatory Administration (SRA) building.
Didto na kag ginsaway ni Esmeralda ang mga kawata, bangod ginakahangaw-an sini nga madamo sang mahimo mahalitan sa ila nga ginbuhat.
Nagalaom ini nga kun sin-o man ang makalantaw sang video sini ang magsunod kag indi magkahadlok kun may makita nga kaangay nga indi husto nga buluhaton agud mag-imprubar ang sosyodad.
Kun wala sang ikasarang sa kaugalingon, ginapanugyan man sini nga ipalab-ot ang mga problema sa nagakaigo nga ahensya, kaangay sang ginhimo sini nga pagdangop sa alkalde.
Ang natungdan ang ginkilala bangod sa pagserbe sini nga inspirasyon sa iban dala ang kaisog kag pagpalangga sa komunidad.
May pila naman ka mga government employees nga ginpasidungan bilang “Outstanding Bacolod City Government Employees” samtang apat naman ang nangin “Banhawanon Awardees”.
Ang mga Banhawanon Awardees amo ang mga indibidwal nga nakahatag sang dako nga kontribusyon sa pagserbisyo sa mga pumuluyo partikular na sa tion sang pandemya.
Sila ang ginalakipan nanday Willy Au, Ian Manuel Lo, Benjamin Lopue Jr., kag Ruby “Token” Lizares.
