Ginpangsaway sang pinuno sa Bacolod Traffic Authority Office (BTAO) ang mga driver sang modernized jeepneys nga kaangay na nga nagaterminal sa atubang sang old City Hall sa Luzuriaga Street, Bacolod City.
Kahapon, ginpalab-ot sang concerned citizen ang natalupangdan sini nga pagginutok sang mga salakyan sa downtown area kun sa diin nagadangat na sa tatlo tubtob apat ang nagataya nga mga modernized jeepney.
Sa interview sang Bombo Radyo Bacolod kay BTAO head Police Major Junji Liba, nagdangat sa iya ang reklamo kahapon sang aga, apang bangod ini ang masako pa sa 85th Charter Day celebration sang ciudad, napadulungan lang sini ang area matapos na sang aktibidad.
Suno diri, naabtan sini mismo nga may duha ka unit sang modernized jeepney nga may ruta Homesite-Central Market nga nakaparada, kag ini ang nagatuga sang trapiko bangod sila ang wala sa gintalana nga loading kag unloading area.
Bangod may-ara na sang nakaparada nga mga salakyan sa lugar, double parking na ang pagplastar sang mga modernized jeepney kag ini ang nagatuga sang trapiko bangod sa madugay nila nga pagtinir sa lugar.
Paathag ni Liba nga nakasugilanon na nila ang operator sa tanan nga routa sang modernized jeepney umpisa pa lamang kag may gintalana na ang mga ini nga designated areas kun sa diin lamang sarang makapapanaog ukon makapasaka sang pasahero.
Magkatuhay man ang loading kag unloading areas sang mga modernized sa traditional jeepneys.
Paathag ni Liba nga sa nakita sini, ang Homesite-Central Market lamang nga ruta sang moderized jeepney ang may problema bangod matawhay man ang sa iban nga routa, gani ila na ini nga ginsaway.
Suno diri, subong nga adlaw, padulongan man niya ang operator sang nasambitan nga ruta agud nga maistoryahan ang issue, apang kun padayun nga magapakatig-a ang mga driver, mapilitan na sila sa pagpatuman sang apprehension.
