Padayon pa nga ginabulong ang isa ka 56 anyos nga babayi matapos ginsanggot sa Sitio Buklad, Barangay Punao, San Carlos City, Negros Occidental.
Ang biktima ang ginkilala nga si Rosemarie Lopez, 56 anyos, mangunguma residente sa Sitio Amihan, Barangay Punao samtang ang suspetsado ang ginkilala naman nga si Rommy Pat, 39 anyos, residente sa Sitio Mahayahay sa kaangay man nga Barangay.
Sa inisyal nga imbestigasyon sang San Carlos City Police Station, hubog ang suspetsado ini ang nagsulong sa balay ni Lopez.
Ginkomprontar sini ang biktima matapos nga makabati sang huring-huring nga siya ang ginatudlo nga nagakuha sang kahoy nga ginapanag-iyahan sang utod sang biktima agud nga ulingon.
May nagluntad naman nga argumento sa tunga sang duha tubtob nga ginhantak na ini sang suspetsado gamit ang sanggot sa nagkalainlain nga bahin sang lawas.
Gilayon naman nga ginhingagaw sa San Carlos City District Hospital ang biktima para sa nagakaigo nga pagbulong.
Nagpalagyo naman gilayon si Pat matapos ang krimen, apang sa hot pursuit operation sang kapulisan natigayon ini nga madakpan.
Sa karun nakahunong na sa kustodiya sang San Carlos City Police Station ang suspetsado kag magapangatubang sang nagakaigo nga kaso.
