Ginatinguhaan sang Himamaylan City Police Station nga maka-execute na sang affidavit ang magatindog nga testigo batok sa mga suspetsado nga nagmassacre sa Pamilya Fausto sa Sitio Kangkiling, Barangay Buenavista sang Hunyo 14 sang gab-i.
Sa interview sang Bombo Radyo kay Police Capt. Arturo Margallo, deputy chief sang Himamaylan City Police Station, nagalaom ang mga ini nga makakuha sang witness agud nga makapasaka sang kaso bangud may nakuha naman nga initial information angot sa pag-massacre sa mag-asawa nga Rolly kag Imelda Fausto kag sa ila mga bata nga sanday Ben, 15-anyos, kag Raben, 11-anyos.
Sa karon, may person of interest na ang Himamaylan City Police Station apang indi pa ini mabuyagyag tubtub nga mapasaka ang kaso.
Suno diri, masobra duha ang suspetsado sa krimen.
Nagakooperar naman ang ginatarget nila nga kuhaon nga witness kag sila ang nagalaom nga mahatagan sang hustisya ang mga biktima.
Suno kay Margallo, tinguhaan nila nga maka-execute sang affidavit ang mga witness nga amo ang gamiton sa pagpasaka sang kaso.
Ginalauman naman nga mapagwa subong nga adlaw ang post-mortem examination report sang doktor.
Aminado naman si Margallo nga indi pa madali-dali ang pamilya sa pag-execute sang complaint bangud kahapon lang nalubong ang apat ka mga biktima.
Suno sa deputy chief, ang nabilin nga miyembro sang Pamilya Fausto ang maga-execute sang complaint affidavit batok sa mga suspetsado.
Indi naman mag-istar liwat sa Sitio Kangkiling ang nabilin nga pamilya kag sila ang naghingyo sang bulig nga makasaylo sa mas hilway nga lugar sa city proper sang Himamaylan.
