Ginpahayag sang station commander sang Bacolod Police Station 7 nga may settlement na sa tunga sang driver sang tricycle, modernized jeepney kag sang pamilya sang 18 anyos nga babayi nga nadunot ang kamot kasunod sang nagluntad nga aksidente sa Purok Kasilingan, Barangay Mansilingan, Bacolod City kahapon sang hapon.
Sa interview sang Bombo Radyo Bacolod kay P/Capt Andy Ofalia, sa inisyal nila nga imbestigasyon nakita nga ang may sala amo ang tricycle driver.
Nahibaluan nga overloaded ang tricycle kun sa diin ini ang nagakarga sang walo ka pasahero rasun kun ngaa ini ang nagtuwas kag nagwaslik padulong sa wala kag nabungguan naman sang sugata nga modernized jeepney.
Bangod sini, nagkaladagdag ang mga pasahero samtang naipit naman kag nadunot ang nawala nga kamot sang 18 anyos nga si Erica Losande, residente sang Sagay City.
Suno kay Ofalia, gilayon nga gindala sa Bacolod Adventist Medical Center ang biktima samtang nagkasugot naman ang magulang sini kag ang driver sang tricycle nga si Francisco Mumfil III, 29 anyos, residente sang Barangay Felisa, Bacolod City kag driver sang modernized jeepney nga may ruta Handumanan-Libertad via Mansilingan kag ginamaneho ni Romeo Perolina, 55-anyos, residente sang Barangay Plaridel, Sagay City.
Pahayag ni Ofalia nga nagpasalig na ang driver sang tricycle nga siya ang magabulig sa biktima kasubong man ang driver sa modernized jeepney, ilabi na nga may insurance man ang salakyan.
Paathag sini nga may-ara naman sang ordinansa ang syudad natuhoy sa kadamuon sang masakay nga pasahero sa mga tricycle.
Apang sila ang indi man makadakop bangod ini ang trabaho na sang Bacolod Traffic Authority Office, gani ang mga kapulisan ang nagasaway na lamang kun may makita nga nagalapas.
Suno kay Ofalia mas maayo kun may-ara sang partikular nga enforcement natuhoy sa mga kaangay nga bayulasyon partikular na sa tion sang rush hour.
Samtang,
Wala gid naghatag sang bulig ang operator sang modern jeep nga nabungguan sang overloaded nga tricycle sa Purok Kasilingan, Barangay Mansilingan, ciudad sang Bacolod kahapon sang hapon kun sa diin nawasak ang kamot sang Grade 11 student nga si Erica Losande sang Sagay City, Negros Occidental.
Kaina sang udto, nagpadulong sa Bombo Radyo ang utod ni Losande nga si Solomon Philip Suarez agud nga magpabutyag sang iya nga sentimyento sa kapaslawan sang pihak nga partido nga magbulig.
Suno diri, may ginkadtuan si Erika kag papauli na sa East Homes 5 kun sa diin nagpungko ini sa atubang sang tricycle.
Suno kay Erica, nagatanga na nga daan ang tricycle samtang yara pa lang sa Cabugwason.
Antes ang aksidente, nakit-an sini nga pwede na kuntani makapreno ukon makalikaw ang modern jeep nga nagabyahe Handumanan-Libertad via Mansilingan apang nagdiretso ini kag didto na nagbunggo ang tricycle.
Naglumpat ang mga upod sini kag si Erica nalang ang nabilin sa tricycle.
Sang natumba ang tricycle, nag-awas si Erica kag nalapakan sang goma sang modern jeep ang iya nawala nga kamot.
Bangud indi na masalbar ang iya kamot, gin-utod nalang ini sang mga doktor.
Sang naistorya ni Suarez ang utod sang tricycle driver, nagkasugot ang mga ini nga masuporta sila sa pasyente sa iya nga hospital bills kag bulong kag nagbisita man sila sa ospital.
Suno diri, indi na sila magpasaka sang kaso kundi naghingyo nalang sang bulig para kay Erica.
Wala naman sang may nag-atubang nga tiglawas nagikan sa modernized jeepney nga ginamaneho ni Romeo Perolina kag may plate number CVA 7284.
Bangud sini, magapasaka nalang sang kaso si Suarez agud matumod kun ano ang responsibilidad sang magtimbang nga bahin.
Bwas nga adlaw, operahan na si Erica apang indi ini maoperahan kun indi sila makabayad sang P70,000.
