Gindugangan sang duha ka adlaw ang petsa nga patigayunan sang plebisito para sa Joint Venture Agreement sa tunga sang Ceneral Negros Electric Cooperative kag MORE Power.
Suno kay Atty. Arnel Lapore, acting general manager sang CENECO, ang National Electrification Administration ang naghatag sang approval nga i-extend ang plebisito sang JVA sa Hulyo 8 kag Hulyo 9.
Sa karun may yara na sang anom ka petsa nga patigayunan sang plebisito lakip na ang Hunyo 24 kag 25 kag Hulyo 1 kag Hulyo 2.
Suno kay Lapore, simultaneous ang pagboto sa area nga nacover sang CENECO kag sila ang magapili lamang sang YES ukon NO.
Kaangay sang barangay kag national and local elections, magapadulong man ang mga konsumidor sa mga eskwelahan kun diin sila naassign agud nga magboto.
Maga-open ang precinct alas-8:00 sa aga tubtob alas-3:00 sa hapon kag sila ang gilayon nga magapatigayon sang canvassing pagkatapos sang kada adlaw.
Suno sa iya, dapat nga makaangkon sang numero sang katunga sang eligible voters plus 1 nga nagboto sang YES agud madayon ang joint venture agreement.
Ang makaboto diri ang lehitimo nga miyembro ukon kosumidor sang CENECO, wala na terminate kag wala nakakas ang kontador, kag wala nadakpan sa pagpangawat sang kuryente.
Samtang, ang indi naman makaboto amo ang miyembro ukon konsumidor nga wala na sang service connection sa CENECO, nadakpan sa pagpangawat sang kuryente, kag ang ginkaksan sang kontador santo sa rekord sang CENECO tubtob Hunyo 2, 2023.
Sa pagboto, dapat yara ang pangalan sa masterslist nga nahamtang sa bulletin board sang barangay hall, sa adlaw sang pagboto magdala sang ID, kag CENECO bill nga may petsa sang karun nga tuig 2023 para sa dugang nga verification.
Maka-isa lang magboto sa joint membership/account kag kaisa lang magboto ang miyembro ukon konsumidor apisar sa madamo nga billing name/ account sa CENECO.
Sa mga korporasyon, makaboto ang gin-awtorisar nga tiglawas, magpresenta lamang sang valid ID kga authorization document.
Pwede man makapadala sang Proxy, dapat may yara sang nakanotaryo nga awtorisasyon para sa proxy, valid ID sang miyembro ukon konsumidor kasubong man sang proxy.
