Desidido ang pamilya sang Grade 11 student nga napilasan sa aksidente sa Purok Kasilingan, Barangay Mansilingan, Bacolod City sang Lunes sang hapon nga magpasaka sang kaso batok sa driver sang tricycle kag modernized jeepney.
Suno sa magulang ni Erica Losande nga si Solomon Philip Suarez, bwas igapasaka ang complaint batok sa driver sang tricycle nga si Francisco Mumfil III, 29-anyos kag residente sang Barangay Felisa, Bacolod City; kag driver sang modernized jeepney nga si Romeo Perolina, 55-anyos, residente sang Barangay Plaridel, Sagay City.
Ini matapos nga wala gid naghatag sang bulig ang operator sang modernized jeepney.
Suno diri, stable na ang kondisyon sang iya manghod apang igapaidalom pa ini sa second operation subong nga hapon agud nga masirado ang inutdan sang tul-an kun sa diin kinahanglan nila nga maghatag sang down payment nga P20,000.
Suno kay Suarez, kinahanglan nga mahatag sang bulig ang magtimbang nga bahin bangud indi na mabalik ang nawala nga kamot sang iya manghod kag madamo pa ini sang handom.
