Nagapabor ang punong barangay sang Ma-ao, ciudad sang Bago sa joint venture agreement sang Central Negros Electric Cooperative kag More Power.
Suno kay Punong Barangay Jovito Gahaton, ang system loss nga ginapas-an sang mga konsumidor ang wala man napuslan sang mga pumuluyo apang ginakarga sa bill ang 11 percent nga losses.
Kun may trouble naman suno kay Gahaton, wala man sang may nagasabat sa hotline sang CENECO.
Magluwas diri, kadugay man islan ang mga gabok nga poste kag daan na ang mga transformer.
Isa man sa problema amo ang gulpyada nga pagbrownout kag gulpyada nga pagbalik sang supply sang kuryente nga nagaresulta sa pagkaguba sang mga electrical appliances sang mga konsumidor.
Nasunog man ang duha ka electric water pump sa high school sa Barangay Ma-ao bangud sa masami nga power interruption kag gulpyada nga pagbalik sang kuryente gani wala sila sang supply sang tubig tubtub subong.
Suno kay Gahaton, 2,000 ang konsumidor sang CENECO sa Barangay Ma-ao kag wala pa sang koneksyon sa lima ka purok bangud masami lang nagatug-an ang power distributor apang wala man sila sang budget.
Bangud sini, ginpatakdan sang barangay sang solar street light ang mga dalan agud nga indi gid tuman kadulom kun gab-i.
