Ginkumpirmar sang regional executive director sang Department of Agriculture Region 6 nga may yara na sang kaso sang African Swine Fever sa ciudad sang Silay kag dugang nga kaso sa banwa sang Hinigaran kag ciudad sang Victorias.
Sa interview sang Bombo Radyo kay Engr. Albert Barrogo, ila na nabaton ang result sa mga test samples sang baboy nagikan sa Bureau of Animal Industry.
Iya ginkumpirmar nga may yara sang duha ka sample nga nagpositbo sa ASF nga nagikan sa Barangay Lantad kag Hawaiian sa ciudad sang Silay kag duha ka dugang nga kaso sa banwa sang Hinigaran kag ciudad sang Victorias.
Samtang, wala naman sang dugang nga kaso sa ciudad sang Bacolod apang padayon sa gihapon ang surveillance.
Ila pa ginapa-verify kun may yara pa sang mga nablilin nga baboy sa Bacolod agud mamonitor sa posiblidad nga nagkala-ubos na ang baboy sang ciudad.
Ini bangid nga ang pag-handle sa amo nga sitwasyon amo nga patyon ang baboy para ma-control ang paglapta sang virus ilabi na nga wala ini sang vaccine.
Samtang, gin-athag sini nga ang mga baboy nga nagsuprer sang hog cholera indi kinahanglan nga patyon bangod may yara sang available nga bulong para diri.
Sa karun may yara pa sang kinahanglan nga mga I-trabaho lakip na diri ang disinfection kag sentinelling process kun sa diin pagabutangan sang baboy ang isa ka area nga maka-agi na nga nagpositibo sa ASF, imonitor ang kondisyon sang baboy kag kun nangin maayo ini, mahimo na nga mabutangan kag maka-repopulate sang baboy sa area.
Apang kahangawa sa gihapon para sa ila ang ini nga proseso bangod may yara pa sang ASF sa luwas sang Bacolod.
Samtang, paathag ni Barrogo, wala sang budget ang ila departamento nga natalana sa karun nga hitabo nga gilayon nagsaka ang kaso sang ASF bangod nga ang budget nila naplastar na sang nakaligad nga tuig pa, apang suno diri, may yara sila sang budget para sa repopulation for recovery.
Sa karun, santo sa ila nga datos, masobra 150,000 na ang nagakalamatay nga mga baboy sa probinsya.
Samtang, sa Hunyo 30 magapanaog na sa pwesto bilang regional executive director si Albert Barrogo kag siya ang pagabuslan ni Dennis Arpia.
Si Barrogo naman ang nangin full-fledged na nga regional technical director for operations and extension sang DA Region 6.
