Ginpanindugan sang Provincial Environment Management Office sang Negros Occidental nga nakacomply sang requirements ang applicant sang quarry operation sa Barangay Malingin, Bago City antes gin-issuehan sang Private Gratuitous Permit nga pirmado ni Governor Bong Lacson.
Ini ang kasunod sang reklamo sang Barangay Malingin Farmers Association nga nagtaliwan na ang applicant nga si Wilfredo Ragudo sang tinalikdan nga tuig gani indi maathag kun paano naissue ang permit subong nga tuig sa iya ngalan.
Suno kay Dr. Rowena Parcon, pinuno sang Regulatory Services Division sang PEMO, ang pito ka mga requirements para sa Private Gratuitous Permit ang ginalakipan sang application form, proof of ownership sang duta nga kuhaan sang duta kag proof of ownership sang duta nga dal-an sang backfill materials; sketch plan sang lugar nga kuhaan sang materials; resolusyon nagikan sa barangay nga wala sang objection; brief description sang work program; litrato sang area; kag inspection kag endorsement sang PEMO.
Suno kay Parcon, nacomply sang applicant nga si Wilfredo Ragudo ang pito ka requirements.
Bangud private property ang kuhaan sang duta, sarang gid ini mahatagan sang Private Gratuitous Permit basta gamiton ini sa iya nga personal nga kinahanglanon kag 1,000 cubic meters lang ang allowed sa iya sa sulod sang 60 ka adlaw.
Bangud 1,000 cubic meters ang duta nga kalkalon, indi naman kinahanglan nga magpatigayon sang public hearing ang mga barangay officials.
Naghingyo man sila sang permiso nagikan sa Department of Agrarian Reform bangud ginpaidalom sa CLOA ang duta.
Santo sa record, si Ragudo ang ginhatagan sang barangay agrarian reform council sang certification nga siya ang agrarian reform beneficiary kag naghatag man sang certification ang Municipal Agrarian Reform Officer sang Bago City.
Suno kay Parcon, wala sila sang ideya kun nagtaliwan na si Ragudo bangud nakacomply man ini sang requirements sa iya nga application kag wala man nakabutang sa mga clearance nga ini ang nagtaliwan na.
Suno diri, notarized ang mga papeles nga ginsumiter gani wala na sa ila nga bahin ang salabton kun matuod ang claim sang mga residente nga nagtaliwan si Ragudo sang tuig 2022.
Bangud nagreklamo ang mga residente sa lugar, nagpanugyan ang PEMO sa ila nga sarang gid nila ini mabantayan bangud mapinahan ang applicant kun nag-exceed ini sa 1,000 cubic meters ukon nagbaligya sang backfill materials sa iban nga tawo.
Kun nagaplano ang mga mangunguma suno sa iya nga magfile sang reklamo, mas maayo nga himuon ini sa mas madali nga tinion bangud tubtub Agusto 7 pa ang ila quarry operations.
