Nagapanawagan ang chairman sang Committee on Senior Citizens sa Sangguniang Panlungsod sang Bacolod sa tanan nga mga barangay sa syudad nga ipasa na ang validated nga listahan sang mga senior citizens nga nagaedad 70 anyos pasaka nga prayoridad para sa social pension.
Sa interview sang Bombo Radyo Bacolod kay Councilor Celia Flor, nagahingyo ini sa 15 tubtob 20 pa ka mga barangay sa syudad sang Bacolod nga isumiter na ang ila validated nga listahan sang mga senior citizens.
Ini bangud sa katapusan nga semana sang Hunyo 2023 ginapaabot nga marelease ang una nga social pension nga ginpondohan sang LGU.
Sa record ni Flor, 8,333 ka senior citizens ang makabenepisyo sa sini nga programa.
Makabaton ang benepisyaryo sang P3,000 halin Enero tubtob Hunyo 2023 ukon P500 sa kada bulan.
Suno sa konsehal, nagpain ang LGU sang P50 million para sa sini nga programa.
Suno kay Flor, sa kada quarter kuntani ang pagrelease sang sini nga ayuda apang ini ang naatrasar bangud ginahulat ang validated nga listahan sang mga benepisyaryo.
Suno sa konsehal, sa 2024, ginapaabot nga malakip na ang 60 anyos tubtob 69 anyos sa sini nga programa bangud pasakaan ang pondo.
