Nagapanawagan ang bise-presidente sang Community Animal Rescue Efforts (CARE, Inc.) sa mga concerned citizens nga makakita sang nagabaligya kag naga-ihaw sang ido nga ini ang kuhaan sang litrato ukon video kag ireport sa pulis ukon sa ila.
Suno kay Ai-Ai Gamboa, madamo sila sang nabaton nga reports nga may nagabakal sang ido sa balor nga P50 tubtob P100 kag ginadala sa Pulupandan kag iban pa nga out of towns agud ibaligya kag ihawon.
Suno sa iya, may mga motor nga nagalibot kag ginatabunan lamang sang sako ang kilid sang sidecar agud indi makit-an nga ido ang unod sini.
Kun kaisa suno diri, nagapanuktok pa ang mga ini sa mga pamalay kag nagapamangkot kun sila ang may ibaligya nga ido.
Suno kay Gamboa, sila ang nagtie-up na sa kapulisan kag ila na natumod kag nakit-an ang lugar nga ginapatigayunan sang dog meat trading apang ini ang dapat nga madakpan sa akto agud nga maaresto.
Magahatag naman sang P5,000 nga padya ang BACH Project PH sa kun sinuman ang makahatag sang impormasyon, litrato ukon video sang dog meat trading sa Negros Occidental.
