Nagapanawagan ang barangay kagawad sang Barangay Buenavista syudad sang Himamaylan sa militar, kapulisan kag provincial government sang Negros Occidental nga hatagan sang hustisya ang pagpatay sa pamilya Fausto sa Sitio Kangkiling, Barangay Buenavista, Himamaylan City, Negros Occidental sang Hunyo 14 sang gab-i.
Sa interview sang Bombo Radyo Bacolod kay Barangay Kagawad Remegio Tuazon Jr, malinong naman ang sitwasyon sa karun sang Barangay Buenavista matapos ang insidente sang pagpatay sa Pamilya Fausto.
Suno kay Tuazon, indi man malipod nga makabatyag pa ang mga pumuluyo sa nasambit nga barangay sang kakugmat kag tension.
Nagalaom man ini nga ang pamilya Fausto na ang ulihi nga mangin biktima sang pagpamatay sa ila nga Barangay.
Ginpasalamatan man sini ang alkalde sang syudad sang Himamaylan nga wala nagkulang sa pagsuporta sa pagpalubong sa mga biktima sang massacre kasubong man sa pagsiguro nga mahatag ang kinahanglan sang pamilya.
Samtang, may yara man sang siguridad nga ginhatag sa nabilin nga pamilya sang mga ginpamatay.
Nagalaom man ini nga mahatagan na sang syudad sang hustisya ang pagpatay sa nasambit nga pamilya kag mabalik na ang kalinong kag katawhay sa Barangay Buenavista, Himamaylan City.
