Nagpasalig ang provincial director sang Negros Occidental Police Provincial Office (NOCPPO) nga mahatagan sang hustisya ang pagpatay sa pamilya Fausto sa Sitio Kangkiling, Barangay Buenavista, syudad sang Himamaylan, Negros Occidental sang Hunyo 14.
Sa interview sang Bombo Radyo Bacolod kay Police Col. Leo Pamittan, ginahingyo sini ang mga residente sa Barangay Buenavista sa nasambit nga syudad nga indi sila magkahangawa bangud ang mga kapulisan kaupod ang militar ang yara nga magsiguro sang ila nga seguridad.
Suno kay Pamittan, may yara na sila sang witnesses nga nakahatag naman sang ila nga statement angot sa nagluntad nga krimen.
Suno diri, ginahulat na lamang nila nga makumpleto ang mga attachments kag kun handa na ang pamilya sang mga biktima ipasaka na sang mga ini ang kaso batok sa mga natumod nga suspek.
Gin-athag man sang provincial director sang NOCPPO nga indi pa solved ang kaso kundi cleared lamang bangud wala pa ini nafile sang complaint.
Liwat man sini ginpasalig nga ginahimo sang mga otoridad ang tanan agud nga masiguro ang seguridad sang mga pumuluyo ilabi na ang mga residente sa Sitio Kangkiling, Barangay Buenavista, Himamaylan City.
Samtang, ginkumpirmar man ni Pamittan nga duha ka mga witness ang nagfile sang ila nga judicial affidavit agud nga magpamatuod nga katapo sang Central Negros 2 sang NPA ang responsable sa pagpatay sa apat ka mga biktima.
Ang nasambit nga affidavit ang mangin kabahin sang mga dokyumento agud mapasaka ang kaso.
Ginpasiguro man sini nga nasecure na ang mga witnesses.
