Gin-athag sang National Electrification Administration nga peke ang mga nagpakilala nga mga interim board of directors ang Central Negros Electric Cooperative (CENECO) kahapon.
Yara kahapon nagtambong si NEA Project Supervisor Atty. Vic Alvaro sa ginpatigayon nga Special Board Meeting kaupod ang Board of Directors sang Ceneco kag General Manager Atty Arnel Lapore.
Suno kay Alvaro, dapat nga ginpaagi sa husto nga proseso kun paano mag-ilis sang board members kag general manager.
Suno diri, indi mahimo nga basta-basta lang nga ipakilala ang kaugalingon bilang bag-o nga board of directors.
Gin-athag sini sa publiko nga wala sang bag-o nga board of directors kag general manager ang CENECO kag ang mga nagpakilala nga board of directors ang iya gintawag nga mga peke, illegal kag impostor.
Samtang, ginapangabay ni CENECO General Manager Atty. Arnel Lapore, nga masanagan ang mga nagpakilala nga bag-o nga board of directors sang CENECO nga ila tamdon ang bwas damlag sang kooperatiba.
Mensahe sini sa mga member consumers nga indi magpatublag kag maggwa kag magboto sa plebisito.
Luyag man sini ipalab-ot sa mga empleyado sang CENECO nga kabay sila masanagan ilabi na ang mga naga-upod kag nagapamati sa nagkalain-lain nga bersyon nga may yara sang kahadlok sa JVA.
Nagapanindugan si CENECO Board of Director Dwight Carbon nga bentaha para sa mga member consumers ang Joint Venture Agreement sa tunga sang CENECO kag Prime Electric Holdings Inc.
Suno diri, iya na gintun-an ang JVA kun sa diin nakita sini ang ang benepisyo nga mahatag sa mga konsumidor.
Pahayag ni Carbon, ang pagpatigayon sang JVA, indi para sa CENECO ukon sa Prime Electric apang ini ang para sa mga member consumers sang kooperatiba.
