Ginpahayag sang commander sang 94th Infantry Battalion sang Philippine Army nga ila pagabasehan ang imbestigasyon sang Philippine National Police sa pagtumod kag pag-aresto sa mga suspetsado sa pagmassacre sa Pamilya Fausto sa Barangay Buenavista, Himamaylan City sang Hunyo 14 sang gab-i.
Suno kay Lt. Col. Van Donald Almonte, may yara sang ginatumod nga mga suspetsado ang mga kapulisan kag ini ang ila mangin basehan sa kun ano ang matuod-tuod nga natabo.
Suno diri, ini ang husto nga proseso agud mahatagan sang kasanagan ang natabo nga massacre.
Kun sin-o man ang ginatudlo sa imbestigasyon sang PNP suno kay Almonte, ini ang ila pangitaon kag arestuhon kun may yara na sang kaso kag makapagwa ang korte sang warrant of arrest.
Sa karon, padayon pa ang combat operation sang militar indi lamang sa Barangay Buenavista apang lakip diri ang kabug-usan nga nasakupan sang 94th Infantry Battalion.
Nagpanugyan ini sa mga katapo sang New People’s Army nga magsurrender kag magbalik sa sabak sang gobyerno agud makapangabuhi sang normal.
