Nangin matawhay ang una nga adlaw sang plebisito para sa Joint Venture Agreement sa tunga sang Central Negros Electric Cooperative kag More Power sa Mandalagan Elementary School.
Suno kay Leo Ceralbo, principal sang Mandalagan Elementary School, may yara sang anum ka mga kwarto ukon precinct para sa masobra 6,000 ka mga konsumedor nga magaboto.
Sa kada precinct, may yara sa tatlo ka mga manunudlo kag may isa man nga gin-assign agud magpanagtag sang numero.
Indi kaangay sang national elections nga per purok ang pangalan, alphabetical ang order sang mga konsumedor kag may yara sang naga-assist nga mga manunudlo kun diin sila makadto.
Pagsulod sang konsumedor sa buluthuan, dapat nga tsekyaron sang mga ini ang ila pangalan sa masterlist.
Sila ang pagahatagan sang numero kag pag-abot sang precinct, ila igahatag sa manunudlo ang number agud tsekyaron ang ila pangalan.
Igapresent sang mga ini ang ila bill kag identification cards kag sila ang pagahatagan sang 1/4 size nga papel nga may pilian kun YES ukon NO.
Dapat nga icheck sang konsumedor kun ano ang iya desisyon kag piluon ang iya papel agud indi makita sang iban.
May yara sang QR code sa idalum sang papel kag indi ang igahatag sa manunudlo agud mabutang sa ballot box.
Samtang, sa lain naman nga ballot box ibutang ang vote ukon ang papel nga gincheckan sang konsumedor.
Pagkatapos sini, pagabutangan man ang voter sang ink sa tudlo.
Suno kay Ceralbo, alas 8:00 sang aga nagsugod ang voting kag tubtob alas 3:00 sang hapon.
May pila lamang sila ka problema nga nasugata kaangay sang mga maproxy apang wala sang proxy form nga notarized sang abogado.
Bilang solusyon, nakig-angot ini sa punong barangay sang Mandalagan kag nahisugtan nga kun magkuha sang proxy form ang mga pumuluyo sa barangay hall, may libre na ini nga notaryo.
May pila man nga wala nakahibalo kun ano ang ila pilion apang suno kay Ceralbo, indi makadikta ang mga manunudlo diri.
Suno sa iya, ang mga representatives nagikan sa CENECO amu ang maga-eksplekar tuhoy sa mga concerns, inquiries kag legal matters sa JVA.
