Mas nagnubo ang numero sang mga member-consumer sang Central Negros Electric Cooperative Inc. (CENECO) nga nagpadulong sa Bacolod City National High School sa Barangay Taculing kahapon, ikaduha nga adlaw sang plebisito angot sa Joint Venture Agreement sa tunga sang Ceneco kag Prime Electric Holdings Inc.
Sa interview sang Bombo Radyo Bacolod kay Jacqueline Barba, Barangay Leader sa Taculing, nagpabilin nga matawhay ang pagpatigayon sang plebisito humalin sang Sabado tubtob kahapon.
Kapin 8,000 ang mga member-consumer sa Barangay Taculing kag sila ang natunga sa pito ka mga precinct nga nahamtang sa classrooms sang Senior High School sa nasambitan nga buluthuan.
Ang plebisito ang gin-umpisahan alas-8:00 sang aga kag nagatakop alas-3:00 sang hapon.
Suno kay Barba, sila amo ang naga-obserbar sa pagpatigayon sang pagboto kag sila man ang naga-assist sa mga member-consumer kun sa diin nga voting precinct nalakip ang ila nga mga pangalan.
Pahayag sini nga sa una nga adlaw 96 pa lamang ang nakabotar sa ila kag sa pagdugang sang kahapon, mahambal nga malayo pa nga malab-ot ang 50 porsyento sang mga botante.
Aminado si Barba nga may-ara gid sang mga nagapadulong kag luyag nga magboto apang wala ang pangalan sa masterlist.
Ang mga ini ang ginarefer na lamang nila sa Ceneco coordinator, kag nakita man nila nga nakahangop ang mga ini kag ginapili na lamang nga magpauli imbes nga magtuga sang kinagamo.
Magluwas sa Hunyo 24 kag 25, may mga masunod pa nga schedule para sa plebisito nga ginalakipan sang Hulyo 1 kag 2, subong man Hulyo 8 kag 9.
